ХҮРЭЭЛЭН БАЙГАА ОРЧНЫ ЭСРЭГ ХЭРГҮҮДИЙГ ШҮҮХЭЭР ШИЙДВЭРЛҮҮЛЛЭЭ

A- A A+
ХҮРЭЭЛЭН БАЙГАА ОРЧНЫ ЭСРЭГ ХЭРГҮҮДИЙГ ШҮҮХЭЭР ШИЙДВЭРЛҮҮЛЛЭЭ

Прокурорын байгууллагаас хүрээлэн буй орчны эсрэг үйлдэгдсэн гэмт хэрэг, зөрчлийг шуурхай шалгаж шийдвэрлэх, экологид учирсан хохирол, хор уршгийг нөхөн төлүүлэх арга хэмжээг тогтмол авч хэрэгжүүлэхэд онцгойлон анхаарч байна.

 Сэлэнгэ аймгийн прокурорын газраас яллах дүгнэлт үйлдэж, анхан шатны шүүхээр шийдвэрлүүлсэн хэргүүдээс тоймлон хүргэж байна. 

- Д.Х  нь Сэлэнгэ аймгийн ... сумын нутаг дэвсгэрт 2025 оны 4 дүгээр сарын 25-ны өдөр хууль бусаар ашигт малтмал олборлох зорилгоор өөрийн эзэмшлийн экскаваторыг байрлуулж, хууль бусаар ашигт малтмал хайх, ашиглах, олборлох гэмт хэрэг үйлдэхээр бэлтгэсэн үйлдэлд Эрүүгийн хуулийн 24.2 дугаар зүйлийн 1 дэх хэсэг (хууль бусаар ашигт малтмал хайх, ашиглах, олборлох)-т зааснаар яллах дүгнэлт үйлдэж, шүүхэд шилжүүлсэн.

Шүүхээс Д.Х-г хууль бусаар ашигт малтмал олборлох гэмт хэрэгт бэлтгэсэн гэм буруутайд тооцож, 5.4 сая төгрөгөөр торгох ял оногдуулж шийдвэрлэжээ.

- Г.З, Ц.Ш, Г.Э, Б.М нар нь бүлэглэн Сэлэнгэ аймгийн ... сумын нутаг дэвсгэрт 2024 оны 6 дугаар сараас 12 дугаар сар хүртэлх хугацаанд тусгай зөвшөөрөлгүйгээр ашигт малтмал олборлох зорилгоор эрэл, хайгуул хийх, техник хэрэгсэл ашиглан тусгай зөвшөөрөлгүйгээр ашигт малтмал олборлох зорилгоор газрын хэвлийд халдаж, хүрээлэн буй орчинд 762,332 төгрөгийн хор уршиг тус тус учруулсан хэрэгт Эрүүгийн хуулийн 24.2 дугаар зүйлийн 1 дэх хэсэг  (хууль бусаар ашигт малтмал хайх, ашиглах, олборлох)-т зааснаар яллах дүгнэлт үйлдэж, шүүхэд шилжүүлсэн. 

Шүүхээс дээрх нэр бүхий 4 иргэнийг бүлэглэн Эрүүгийн хуулийн 24.2 дугаар зүйлийн 1 дэх хэсэгт заасан гэмт хэрэг үйлдсэн гэм буруутайд тооцож, 5.5 саяас 6 сая төгрөгөөр тус тус торгох ял оногдуулж, хүрээлэн буй орчинд учирсан 1.1 сая төгрөг, нөхөн сэргээлтийн ажлын зардал 344,332 төгрөгийг тус тус төлж барагдуулсныг дурдан, гэмт хэрэг үйлдэхдээ ашигласан техник хэрэгсэл болох 7.5 сая төгрөгийн үнэлгээ бүхий экскаватор 1 ширхэг, 630,000 төгрөгийн үнэлгээ бүхий 2 ширхэг ус татах төхөөрөмжийг тус тус улсын орлого болгохоор шийдвэрлэжээ.